Լրագրող և հաղորդավար եմ: 2018 թվականից վարում եմ Atv հեռուստաալիքով հեռարձակվող «Հաջողության բանաձև» կրթական հաղորդումը, որի ընթացքում զրուցում եմ ամենատարբեր մասնագիտությունների մեջ հաջողության հասած մասնագետների հետ՝ հեռուստադիտողին օգնելով մասնագիտության ճիշտ և գրագետ ընտրության հարցում:

Բազային կրթությունս ստացել եմ Հայկական պետական մանկավարժական համալսարանի կուլտուրայի ֆակուլտետում (հեռուստառադիոլրագրության բաժին): Այժմ կրթությունս շարունակում եմ նույն բաժնի մագիստրատուրայում: 2019 թվականին ավարտել եմ ՀՊՄՀ-ի և Բելառուսի պետական մանկավարժական համալսարանի համատեղ իրականացրած «Ամառային դպրոց» միջազգային կրթական ծրագիրը: Ուսումնառության տարիներին թղթակցել եմ «Ճամփորդ» շաբաթաթերթին, մասնագիտական հմտություններս փորձել նաև մի շարք այլ լրատվամիջոցներում:

Մասնագիտության մեջ առավել զարգանալու ու անընդհատ սովորելու իմ մոտիվացիան նախ գալիս է այն շատ սիրելուց. վստահորեն ամենուր ասում եմ՝ լրագրությունն է ինձ ընտրել, այլ ոչ թե ես նրան: Ուղիղ 7 տարի է անցել լրագրության մեջ մասնագիտական գիտելիքներ ձեռք բերելու իմ առաջին որոշումից: Այդ տարիների ընթացքում հասկացա, որ կայացրել եմ ճիշտ որոշում, և որ սա մասնագիտություն է, որը սովորում են փորձի ու դրա փոխանակման ընթացքում: Լրագրողի մասնագիտությունը պահանջում է լինել պատասխանատու սեփական աշխատանքի նկատմամբ, լինել սթրեսակայուն, նախաձեռնող, ունենալ մարդկանց լսելու, արագ կողմնորոշվելու և թիմային աշխատանք կատարելու կարողություն ձեռք բերել:

Հետք Մեդիա Գործարանում սովորելը տարբեր ծանոթությունների և մասնագիտության մեջ էլ ավելի զարգանալու հիանալի փորձ է. ժամանակակից լրագրությունը պահանջում է անընդհատ թարմացվող գիտելիքներ տարբեր ոլորտներից: Այս մասնագիտության մեջ աճելու միակ ճանապարհն անընդհատ սովորելն է, բայց, անշուշտ, աշխատելով:

Հետևի՛ր մեզ


Գաղտնիության քաղաքականություն | Գործընկերներ

© Բոլոր իրավունքները պատկանում են Հետք Մեդիա Գործարանին: Մեջբերումներ անելիս՝ հղումը mediafactory.am-ին պարտադիր է։
+374 44 20 20 48 Նալբանդյան 106/1, Սայաթ-Նովա բիզնես կենտրոն, Երևան, 0001: