8808 երեխա Երևանում սպասում է մանկապարտեզի իր հերթին. ինչպես է փակվել Կոմիտաս 3-ի մանկապարտեզը

Պաշտոնյաները սեփականաշնորհել են Կոմիտաս 3 հասցեի մանկապարտեզը

Կոմիտասի պողոտայի սկզբնամասում գործող մանկապարտեզը 1994 թվականին փակվել է, այնուհետեւ՝ սեփականաշնորհվել: Այդ գործընթացն իրականացրել է Երևանի քաղխորհրդի գործադիր կոմիտեն, որի նախագահն (քաղաքապետը) այդ ժամանակ եղել է ՀՀ նախագահ Վահագն Խաչատուրյանը։

Մանկապարտեզի տարածքը սեփականաշնորհել են Արաբկիրի շրջխորհրդի այդ ժամանակվա քարտուղար, այնուհետև՝ պատգամավոր Հարություն Խաչատրյանը և Կապի նախարարության մեջ ներառված «Հայփոստ» ձեռնարկության տնօրեն, այնուհետև «ԱրմենՏել» ընկերության նախկին փոխտնօրեն Արտակ Ղահրամանյանն ու կինը:

Արաբկիր համայնքում այսօր գործում է 13 մանկապարտեզ: Այս մանկապարտեզներում տեղ չկա, բնակիչները տարիներով սպասում են իրենց հերթին՝ երեխաներին մանկապարտեզ տանելու համար:

Արաբկիրի բնակիչ Սյուզաննա Հովհաննիսյանը երկու երեխա ունի։ Ավագ որդին 3.5 տարեկան է, կրտսերը՝ 3 ամսական:

«Մեծիս մանկապարտեզ տանելու համար 2 տարի առաջ հերթագրվել եմ Արաբկիրի թիվ 33 մանկապարտեզում: Ինձ նման բազմաթիվ ծնողներ կան, որ հերթի մեջ են: Կոմիտասում մանկապարտեզ գրանցելուց հետո բնակավայրից տեղափոխվել ենք, սակայն վախից, որ կկորցնենք մեր տեղն ու ստիպված նորից այսքան երկար կսպասենք, չենք գրանցում ուրիշ մանկապարտեզում։ Անգամ հասկանում ենք, որ հետագայում դժվար է լինելու երեխային մանկապարտեզ տանել և տուն բերել, բայց ուրիշ ելք չկա» – ասում է Սյուզաննան:

Կոմիտաս 3 հասցեում մինչև 1994 թվականը մանկապարտեզ է գործել: Այն տեղակայված էր այդ նույն հասցեի բնակելի շենքի առաջին և նկուղային հարկերում: Նկուղային հարկը զբաղեցրել է ճաշարանը: Մանկապարտեզը զբաղեցրել է մոտ 200 քմ տարածք։

Մանկապարտեզի տեղում հիմա մեկ բնակարան է, մնացած հատվածում «ՀայԷկոնոմբանկի» մասնաճյուղ է և «Կոկո վինտաժ» հագուստի խանութը, իսկ նկուղային հարկի մի մասում՝ տուրիստական գործակալություն։

Կոմիտաս 3 շենքի տարեց բնակիչները հիշում են իրենց շենքում գործող մանկապարտեզի մասին, սակայն սեփականաշնորհման մասին տեղեկություններ չունեին:
Մանկապարտեզի տարածքը երկու սեփականատեր ունի

Կոմիտաս պողոտայի 3-րդ շենքի առաջին հարկում գտնվող մանկապարտեզի տարածքը մասնավորեցումից հետո ստացել է երկու հասցե՝ Կոմիտաս պողոտա 3-րդ շենք, 46 և 47: 1995 թվականի նոյեմբերի 11-ին Կոմիտասի 3, շենք 46 հասցեի անշարժ գույքի սեփականատեր է դարձել Անահիտ Երվանդի Խաչատրյանը, 2004 թվականին՝ նրա եղբայրը՝ Հարություն Երվանդի Խաչատրյանը: Այդ գույքի մի մասը որպես բնակարան է օգտագործվում, իսկ մյուս մասը՝ հագուստի խանութ։ Ըստ Կադաստրի կոմիտեից ստացված փաստաթղթերի, անշարժ գույքը 93 քմ է։ Մենք կարողացանք պարզել, որ Հարություն Խաչատրյանը ինքնակամ տնօրինում է այս գույքի տակ գտնվող նկուղային հարկի մի մասը, որտեղ այսօր գործում է տուրիստական ընկերություն։ Արաբկիրի վարչական շրջանի «Շենքերի կառավարում» համատիրությունից պարզեցինք, որ նկուղի համար Հարություն Խաչատրյանը մինչև 2017-ը վարձավճար է վճարել համատիրությանը, սակայն դրանից հետո՝ ոչ։ Նկուղային հարկը Կոմիտաս 3 շենքի սեփականատերերի բաժնային սեփականությունն է և դա սեփականաշնորհելու համար բոլորի թույլտվությունն է պետք։ Ինչպես Երևան քաղաքի բազմաթիվ շենքերում, այստեղ էլ առաջին հարկի սեփականատերն ինքնակամ օգտագործում է նկուղային հարկի մի մասը։

Հարություն Խաչատրյանը «Հայոց համազգային շարժում» կուսակցության անդամ է եղել: 1991-ին ընտրվել է Երևանի Արաբկիրի շրջխորհրդի քարտուղար, 1993-ին՝ շրջխորհրդի գործկոմի նախագահի առաջին տեղակալ: 1995 թվականին ընտրվել է Գերագույն խորհրդի պատգամավոր: Մանկապարտեզի տարածքը Խաչատրյանը սեփականաշնորհել է, երբ Արաբկիրի շրջխորհրդում բարձր պաշտոն էր զբաղեցնում։ Քաղաքապետարանի հայտնած տեղեկություններով՝ Խաչատրյանը 2007-2016 թթ. աշխատել է Արաբկիր վարչական շրջանի ղեկավարի տեղակալ, այնուհետև՝ աշխատակազմի քարտուղար, իսկ 2016-2020 թթ. եղել է Երևանի քաղաքապետարանի աշխատակազմի կոմունալ տնտեսության վարչության համատիրությունների հետ աշխատանքների բաժնի պետ:

Կոմիտասի պող. 3, 47 հասցեում այժմ վարձակալության իրավունքով տեղակայված է «Հայէկոնոմբանկը»: Կադաստրի կոմիտեի տվյալներով՝ գույքի առաջին հարկի մակերեսը 118 քմ է, բացի դրանից՝ կա նաև 17 քմ սեփականաշնորհած նկուղ։ Ինչպես տեսնում եք, ի տարբերություն Հարություն Խաչատրյանի, գույքի այս մասի սեփականատերերը կարողացել են շենքի նկուղի մի մասը սեփականաշնորհել։

Տարածքի առաջին սեփականատերը եղել է Արտակ Ղահրամանյանը: Այնուհետև գույքը նրանից ձեռք է բերել Արտաշես Գաբրիելյանը, իսկ 2002 թվականին առուվաճառքի պայմանագրով գույքը նորից գրանցվել է Արտակ Ղահրամանյանի և նրա կնոջ՝ Արծվիկ Հերթևցյանի անուններով, ընդհանուր համատեղ սեփականության իրավունքով: Հետագայում՝ 2012 թվականին, ամուսինները գույքը վաճառել են այլ անձի։ Արծվիկ Հերթևցյանը ՀՀՇ անդամ է եղել, աշխատել է ՀՀ ԳԽ ընդունարանի վարիչի, ՀՀ Ֆինանսների նախարարությունում կադրերի բաժնի վարիչի պաշտոններում: Այնուհետև Երևանի քաղաքային խորհրդի պատգամավոր է եղել, ՀՀՇ խմբակցության անդամ:

Մանկապարտեզին վերաբերող արխիվային փաստաթղթեր
Հայաստանի ազգային արխիվում գտանք Արաբկիրի շրջանային խորհրդի գործկոմի մի շարք որոշումներ, որոնց հիման վրա մանկապարտեզը նախ փակել են, ապա՝ սեփականաշնորհել։

1994 թվականի սեպտեմբերի 29-ի նիստում Արաբկիրի շրջանային խորհուրդը որոշել է երեխաների թվի պակասի պատճառով լուծարել Կոմիտասի սկզբնամասում և Կիևյան փողոցներում գտնվող թվով 4` հ. 98, 138, 161, 185 մանկապարտեզները: Մոտ մեկ ամիս անց լուծարվել է թիվ 185 մանկապարտեզը:

1995 թվականի մարտի 24-ին արդեն Երևանի քաղաքային խորհրդի գործադիր կոմիտեի նիստում նկատողություն է հայտարարվել Արաբկիրի շրջխորհրդի գործկոմի նախագահի տեղակալ Հարություն Խաչատրյանին՝ նախատեսված մանկապարտեզները լուծարելիս անօրինականություն թույլ տալու համար: Նիստը նախագահել է Վահագն Խաչատուրյանը։ Այս փաստաթղթում կան նաև խորհրդի անդամներից մի քանիսի նկատառումները մանկապարտեզի լուծարման վերաբերյալ: Երևանի քաղխորհրդի գործադիր կոմիտեի ղեկավարի առաջին տեղակալ Յուրի Բախշյանը նշել է, որ մանկապարտեզների լուծարումը պետք է համապատասխանեցնել գործող կարգին, որից հետո անդրադառնալ այն բնակֆոնդի հաշվին ընդգրկելու հարցին։

Քաղաքային խորհրդի կրթության վարչության պետ Օնիկ Վաթյանը նիստում ասել է, որ Արաբկիրի շրջգործկոմը ոչ թե պետք է որոշում ընդուներ լուծարման մասին, այլ այդ հարցով դիմեր Երքաղխորհրդի գործկոմ: Այդ ամենից հետո նույն նիստում հաստատվել է 1994 թվականի նոյեմբերին մանկապարտեզները լուծարելու ակտը:
Փորձեցինք պարզաբանում ստանալ Հարություն Խաչատրյանից, սակայն տարածքի սեփականաշնորհման մասին մեր հարցերը լսելուց հետո նա հրաժարվեց հարցազրույց տալ՝ պատճառաբանելով, թե 30 տարի է անցել այդ օրերից և որեւէ բան չի կարող հիշել:
Հայաստանի անկախացումից հետո մինչև 2010 թվականը Երևանում գործող 318 մանկապարտեզից փակվել է 156-ը։ Փակված մանկապարտեզների տարածքները սեփականաշնորհվել են։ Որպես կանոն՝ դրանց սեփականատեր են դարձել ներկա կամ նախկին պաշտոնյաներ կամ նրանց հետ փոխկապակցված անձինք։
Եվա Հարությունյան, Մարգարիտա Հարությունյան, Մանան Բադալյան

Հետևի՛ր մեզ


Գաղտնիության քաղաքականություն | Գործընկերներ

© Բոլոր իրավունքները պատկանում են Հետք Մեդիա Գործարանին: Մեջբերումներ անելիս՝ հղումը mediafactory.am-ին պարտադիր է։
+374 44 20 20 48 Նալբանդյան 106/1, Սայաթ-Նովա բիզնես կենտրոն, Երևան, 0001: