Դատարանը վճռել է՝ «Կոտայք» ՋՕԸ ճարտարագետը կշարունակի աշխատել

Հետք Մեդիա Գործարանն օրեր առաջ անդրադարձել էր «Կոտայք» ջրօգտագործողների ընկերությունում տեղի ունեցած աշխատանքային իրավունքի խախտման դեպքերին։

Հիշեցնենք, որ մեզ էին դիմել ջրօգտագործողների ընկերության աշխատակիցներ՝ նշելով, որ իրենց ազատել են աշխատանքից՝ քաղաքական հայացքների պատճառով։

Սեդրակ Մարտիկյանը մեկն է այդ աշխատակիցներից. նա 2017 թվականից աշխատել է «Կոտայք» ՋՕԸ-ում` որպես գլխավոր ճարտարագետ։ Ըստ Մարտիկյանի փաստաբան Սուսաննա Սա

րգսյանի՝ գործատուի հետ խնդիրները սկսվել են այն ժամանակ, երբ Սեդրակ Մարտիկյանը ֆեյսբուքյան իր էջում կիսվել է իշխանությանը քննադատող հրապարակմամբ։

2021 թ-ի դեկտեմբերի 2-ին Կոտայքի մարզի առաջին ատյանի դատարանը բավարարել է Սեդրակ Մարտիկյանի հայցը, որով պահանջում էր վիճարկել իր հեռացման հրամանը։

Դատալեքսից տեղեկանում ենք, որ անվավեր է ճանաչվել «Կոտայք» ջրօգտագործողների ընկերության տնօրեն Վլադիկ Աբրոյանի` Սեդրակ Մարտիկյանին աշխատանքից ազատելու հրամանը՝ վերջինիս վերականգնելով ընկերության գլխավոր ճարտարագետի պաշտոնում:

Դատարանը վճռել է ընկերությունից հօգուտ Սեդրակ Մարտիկյանի բռնագանձել 264 հազար 285 ՀՀ դրամ՝ որպես 2021 թվականի փետրվարի 15-ից մինչև մարտի 5-ը ընկած ժամանակահատվածի համար հաշվարկված հարկադիր պարապուրդի գումար և 2021 թվականի մարտ ամսից մինչև Սեդրակ Մարտիկյանին աշխատանքի վերականգնելու օրը, հօգուտ Մարտիկյանի բռնագանձել հարկադիր պարապուրդի գումար՝ նրա միջին աշխատավարձի չափով:

Կարդացեք այս թեմայով հետաքննությունն այստեղ։