«Տատիի դերն էլ չկա». Աիդային տանը «մամա» են ասում

55-ամյա Աիդան երկու թոռնիկ ունի, բայց տատիկ չէ արդեն 13 տարի։ Աննան ու Արմենը նրան «մամա» են ասում։

13 տարի առաջ Աիդայի աղջիկը՝ Գյուլիզարը, մահացավ ավտովթարից։ 23 տարեկան էր։ Ընտանիքի կյանքը փոխվեց։ Երեխաները՝ 2 տարեկան Աննան և 3 ամսական Արմենը, մնացին Աիդայի հույսին։

Աիդայի առավոտը շուտ է սկսում՝ տուն, հող, կենդանիներ․ հանգստի ժամանակ չունի։ Ասում է․ «Ես որ հանգստանամ, իմ երեխաներին ո՞վ կպահի»։

Աիդայի սիրած անկյունն է։ Սիրած ծաղիկը կալան է։

«Իմ երեխեքը». ասում է Աիդան թոռների մասին խոսելիս։

— Շատ ծանր էր,— Աիդան հիշում է աղջկա մահվանը հաջորդած ամիսները։

Մի կողմից՝ կորստի ցավը, մյուս կողմից՝ երկու փոքր երեխաների խնամքը։

— Ո՛չ պատմելու ա, ո՛չ պատկերացնելու,— ասում է Խաչիկը՝ Աիդայի որդին։

Խաչիկն ավտովթարի ժամանակ զինծառայող էր։ Գյուլիզարի թաղումը հետաձգեցին մինչ նրա գալը։

— Իմ աղջկան ես պահեցի, չթողեցի, որ թաղեն։ Ասեցի՝ մնա, մինչև տղես բանակից գա,— հիշում է Աիդան։

Մոր մահից հետո երեխաների հայրը փորձել է վերցնել խնամակալությունը, բայց ընտանիքը չի համաձայնել. երեխաները մնացել են Աիդայի հետ։

Աիդան երեխաներին ամուսնու՝ Գրիգորի հետ է մեծացրել։ Յոթ տարի առաջ Գրիգորը մահացավ չարորակ ուռուցքից։ Աիդան ջերմությամբ է հիշում նրան։

Մայիսին Աննայի վերջին զանգն էր։ Երազում է մատնահարդար դառնալ։

— Մորքուրից ա սովորել, հիմա իմ ձեռքին ա փորձում,— ասում է Աիդան:

Արմենը մորն օգնում է հող մշակելիս, պատահում է՝ ոչխարները սարն է տանում։ Ազատ ժամանակ ընկերոջ՝ Արամի հետ հեծանիվ են քշում, ֆուտբոլ խաղում։

Աիդան ասում է՝ Արմենն ու Աննան իրեն հասկանում են մեկ հայացքից։ Նկատողություն լինի, թե խնդրանք՝ խոսքի կարիք չի լինում։

Երեխաները սիրում են գյուղը, բնությունը։ Աիդան էլ ասում է՝ գյուղից դուրս չի կարող ապրել. ամուսինն ու աղջիկն այստեղ են։

Գիշեր լինի, թե ցերեկ, Աիդան տան դուռը չի կողպում, ասում է՝ ինչի՞ց վախենամ։

2022-ի սեպտեմբերի 13-ին, երբ Ադրբեջանը կրակում էր նաև Գեղարքունիքի ուղղությամբ, Աիդան պայթյունից չի վախեցել, մտածել է՝ երկրաշարժ է։ Ուզում է, որ իր երեխաներն էլ քաջ լինեն։

Աիդան մեզ ամուր գրկեց ճանապարհելիս։ Օրեր անց զանգեց, հրավիրեց Աննայի վերջին զանգի միջոցառմանը։

Խաչիկն ասում է՝ տանը տատիկի դերն արդեն վաղուց փոխվել է։

— Տատիի դեր էլ չկա… դարձել ա մամայի դեր։