«Հիսուսը» պատրաստ սպասում է

Շուրջ երկու տարի տևած քննարկումների, փաստաթղթերի բազմակի կարգավորումների և թույլտվությունների տրամադրումից հետո Հայաստանում՝ Հատիս լեռան գագաթին, 2025-ին պիտի որ կանգնեցվի Հիսուս Քրիստոսի արձանը։ Գաղափարը գործարար Գագիկ Ծառուկյանինն է, ֆինանսավորումը՝ նույնպես։

Հիսուս Քրիստոսի 33 մետրանոց ալյումինե արձանը ու 44 մետր բարձրությամբ պատվանդանը արդեն պատրաստ են։ Արձանի հեղինակը ճարտարապետ, քանդակագործ Արմեն Սամվելյանն է։ Նա ընտրվել էր հինգ ամիս տևած մրցույթի արդյունքում։

Շուտով շատերի պատուհանից կերևա «ամենաբարձրն ու ամենագեղեցիկը»՝ Հիսուսի արձանը։

2022-ի մարտի 23-ին Մայր Աթոռ Սուրբ Էջմիածնում գումարվել է Գերագույն հոգևոր խորհրդի (ԳՀԽ) ժողով, որի ընթացքում քննարկվել է Գագիկ Ծառուկյանի կողմից Հայաստանում Հիսուս Քրիստոսի արձան կառուցելու նախաձեռնությունը:

Հատիս լեռան վրա Հիսուս Քրիստոսի արձան կանգնեցնելուն Հայ առաքելական եկեղեցին դեմ է՝ հիմնավորմամբ, որ դա հակասում է մեր եկեղեցու դարավոր պաշտամունքային ավանդույթին։ Մայր Աթոռի տարածած հաղորդագրության մեջ նշված է, որ «Գերագույն հոգևոր խորհուրդը հորդորում է նախաձեռնության հեղինակներին զերծ մնալ Հայաստանյայց Առաքելական Սուրբ Եկեղեցու ավանդույթին հակասող նախագծերից և առաջնորդվել ազգային-եկեղեցական մշակույթին ու եկեղեցաբանական սկզբունքներին համահունչ մոտեցումներով»։

Կառավարության ղեկավարը՝ վարչապետ Նիկոլ Փաշինյանը, արձանի կանգնեցմանը կողմ լինելու մասին հայտարարեց 2022-ի հուլիսի 7-ին կառավարության նիստում։

Գագիկ Ծառուկյանը վստահ է՝ Հիսուսի արձանը կակտիվացնի Հայաստանի զբոսաշրջությունը։ Նրա խոսքով՝ մեր երկիրը չունի գազ, նավթ, ոսկի ու ադամանդ, բայց ունի տուրիզմը զարգացնելու հիանալի հնարավորություն։

Հիսուս Քրիստոսի արձանի բացումը նախատեսվում է 2025-ի ավարտին։ Մինչ դա՝ ավարտված կլինեն նաև Հատիս լեռան վրա կառուցվող համալիրի և հարակից ճոպանուղու աշխատանքները։